Options
Audio Exotics的路: 不跟潮流，創造傳统
如果說追趕音響潮流的文化能為音響業務帶來最大的光芒，那麽Audio Exotics的就是這種光芒相反的黑暗。雖然同是為音響業的進步而努力，但Audio Exotics選擇了深入研究與探討每項產品的設計理念，與設計者研究創造及生產技術，再行定立一個合理的售價。這做法不單只費時而且沒有一窩蜂的名牌效應去賺錢，但我們的根基和信譽就是由這樣建立起來。這個理念其實是來自一碗糖水。
很多很多年前，兩個小子JLam和PT家人曾到過澳門2日遊。那次我們到過很多一般人會去的名氣景點，也吃過澳門出名的葡餐。但最令我倆留下深刻印象的反而是在光復街賣蛋茶的老伯夫婦。那架木頭車子，那個炭爐，那條長長的在等買蛋茶的名貴房車車龍，我倆仍歷歷在目！當時仍傻傻更更的我倆，見有人排隊就又去跟住排。一條在午夜後才出現在街上的人龍的確很特別！很失望，因為未到我們已賣光了！八卦到極的我和PT很想知道老伯成功之道，於是我們……
J ： 老伯老伯，你D蛋茶咁出色，賣幾錢？
伯 ： 七蚊。
PT ： 咁平？點解唔增強出品量，或加價清除過份需求？
伯 ： 冇必要。做多D會影響味道，七蚊我覺得好合理。
J ： 點解唔開鋪請多D人谷宣傳做大佢？
伯 ： 宣傳？我嘅亞伯蛋茶唔係時興嘢，係食完會再食嘅傳统糖水！
PT ： 你唔怕有人抄你咩？
伯 ： 抄過啦！抄到咩？我花咁多年研究所煲嘅蛋茶唔係求其煲出嚟宣傳吓就得。冇基楚又要宣傳，租又貴，點做？當時興嘢做死緊，谷一輪，試過唔好味唔再嚟，死埋。
PT ： 可以加D新意….杏仁蛋茶，合桃蛋茶….加強市場佔有率！
伯` ： 咁己經唔係蛋茶，係杏仁加蛋啦，又係新潮嘢，興一輪咪冇囉！
J ： 老伯，咁你嘅蛋茶之道係咩？
伯 ： 慢慢一步步做，煲到好先賣出街。有實力有基楚唔怕開始蝕，之後實會上！有咗小小成功就唔好即刻龍飛鳳舞，亂擴展，加D咩杏仁味又加人價，即係掠水。做好咗基本打好根基，要人地永遠記得蛋茶就係呢個亞伯！就係咁。我有一碗留起自已食，依家請你兩個細路試吓有實力嘅糖水，哈哈…..
J ：好好味呀！
PT ：喂！你食晒隻蛋！
J ：隻蛋糖心…..好香好好味！
蛋茶亞伯所說的道理我和PT仍然銘寄心中。Audio Exotics亦是本著這個信念打好基楚。一個好好的例子，Argento已經在本港的線材市場有超過了四年歷史，它不是靠什麼名牌大廠而打響名堂，而是立定了以提供最高度傳真為目標，不斷努力而得來。
時至今日，幾年前的Level One電源線和SMR訊號線仍然有很多音響愛好者找尋選用！只是一條中檔的cable，但Argento的根楚已經打好，每一個系列也能給予玩家所需。沒有花巧也沒有取巧，實實在在的質素，明碼實價。和那碗亞伯蛋茶一樣，建立起根基，建立起傳统。不是你今天來玩 XX1，明日又出條豪華XX2……一直追新款追潮流。Audio Exotics不是潮流市場的攻堅者，而是一檔木頭車有實力蛋茶，不論你駕駛勞斯來斯或是穿拖鞋街坊，一樣公平一樣有權享受。這就是AE方向。
我知蛋茶亞伯還建在啊！有空去澳門光復街晚上十一時半後，那條車龍人龍一如以往。
0